⚡ மழைக்கால மின்சாரப் புகார்களுக்கு ஒரே எண்

⚡ மழைக்கால மின்சாரப் புகார்களுக்கு ஒரே எண் – EB complaint number 94987 94987

Author - D-Softech

October 16, 2025

காஞ்சிபுரம், அக்.16:

மழைக்காலங்களில் மின்சாரம் தொடர்பான எந்தவிதமான புகார்களுக்கும் பொதுமக்கள் 94987 94987 என்ற எண்ணில் எந்த நேரத்திலும் தொடர்பு கொள்ளலாம் என மின்வாரிய செயற்பொறியாளர் எஸ்.செல்வம் வெளியிட்டுள்ள செய்திக்குறிப்பில் தெரிவித்துள்ளார்.

காற்று மற்றும் மழைக்காலங்களில் மின்மாற்றிகள், மின்கம்பங்கள், மின்பகிர்வு பெட்டிகள் போன்றவற்றின் அருகில் செல்ல வேண்டாம்.

மின்கம்பிகள் அறுந்து கிடந்தால், அதை தொடாமலும் அருகில் செல்லாமலும் இருந்து உடனடியாக அருகிலுள்ள மின்வாரிய அலுவலகத்துக்கு தகவல் தெரிவிக்குமாறு கேட்டுக்கொள்ளப்பட்டுள்ளது.

மின்மாற்றிகள் மற்றும் மின்பகிர்வு பெட்டிகள் அருகில் தண்ணீர் தேங்கியிருக்கும் சூழலில் அவற்றின் அருகில் செல்லக் கூடாது. அத்தகைய நிகழ்வுகள் குறித்து உடனடியாக மின்வாரியத்துக்கு தகவல் வழங்குமாறு பொதுமக்களுக்கு அறிவுறுத்தப்பட்டுள்ளது.

புதிய கட்டிடங்கள் அமைப்பவர்கள் மின்கம்பிகள் அருகே பணிபுரியும் போது பாதுகாப்பு இடைவெளியை உறுதிசெய்ய வேண்டும். மேலும், கனரக வாகனங்களை மின்மாற்றிகள் அல்லது மின்கம்பங்கள் அருகில் நிறுத்தி சரக்குகளை ஏற்றவோ இறக்கவோ செய்யக்கூடாது.

தேர்த்திருவிழாக்கள் நடத்துபவர்கள் முன்கூட்டியே மின்வாரிய அலுவலகத்துடன் தொடர்பு கொண்டு, தேவையான பாதுகாப்பு நடவடிக்கைகளை மேற்கொண்ட பின் தேரோட்டம் நடத்துமாறு அறிவுறுத்தப்பட்டுள்ளது.

மின்சாரம் தொடர்பான எந்தவொரு பிரச்சினைக்கும் 24 மணி நேரமும் இயங்கும் புகார் மையம் வழியாக 94987 94987 என்ற கைபேசி எண்ணில் தொடர்பு கொண்டு புகார் அளிக்கலாம்.

பொதுமக்கள் பாதுகாப்பு விதிமுறைகளை கடைப்பிடித்து, மின்வாரியத்துக்கு ஒத்துழைப்பு வழங்குமாறும், இதன் மூலம் மின்பாதிப்புகளைத் தவிர்க்கலாம் என கூறப்பட்டுள்ளது.

📰 காஞ்சிபுரம் மாவட்ட தலைமைச் செய்தியாளர்: E. ஜாபர்